games movies songs programs
 
HomemezaCalendarFAQSearchMemberlistUsergroupsRegisterLog in


Share | 
 

 كيف تشتري شاشة نحيفة ( lcd )

View previous topic View next topic Go down 
AuthorMessage
ميزا
مدير المنتدى


عدد المساهمات : 280
تاريخ التسجيل : 2009-11-13
العمر : 32
الموقع : http://dvdallarabs.hot-me.com

PostSubject: كيف تشتري شاشة نحيفة ( lcd )   Mon Apr 12, 2010 10:39 am



مع احترام الدائم للخبراء
الكلام موجه للناس اللي زي حالاتي

فما زلت تلميذا في ذلك العالم اللي جنني

نخوووووش في الموضوع


السلام عليكم الأول :

مين رد السلام

الشاشات المبططة : هكذا يطلق عليها العامة : لسبب بسيط : أكيد حد بططها .... بصراحة كتر خيره ..........

أما اسمها في العالم العربي عند المثقفين : فيكون : شاشة ال سي دي LCD Moniter

خلاص : راح زمن العضلات وأمراض الظهر زي الغضروف اللي جالي ..... وجاء زمن الشاشات النحيفة شكلها أحلى ووزنها أخف وفوائدها كتير زي : الاستهلاك الأقل للكهرباء والمساحة الأقل والإشعاعات الأقل ضررا
( رغم إن الشاشات التخينة لها فضلها : صورتها رائعة وخاصة في الأفلام والألعاب .... وعمرها أطول ..... وبتربي عضل ... ومفيدة جدا لشركة الكهربة وتحصيل الزبالة عليها )
مع العلم إن الشاشات المبططة دي لها عمر افتراضي تقريبا خمس ست سنوات ... وإنت وحظك ........ اتأكدوا من المعلومة من مصادر أخرى .......

وقبل ما تقرر تخلص ميزانيتك على شاشة خفيفة نحيفة ظريفة.... لازم تعرف حتصرف على إيه ...

يعني موضوعنا عن الشاشات النحيفة وكيف تشتريها ولية ...؟؟؟ نبدأ على بركة الله ........ رقم :

1 - سرعة استجابة الصورة ( Response Time )
وده معناه سرعة ظهور الصورة على الشاشة ..... وكلما كان الرقم أقل كانت الصورة أسرع ... الميزة دي تهم الناس حريفة الجيم والناس الغاوية أفلام ...... فلو كانت سرعة الاستجابة قليلة حيبان تمويه من ورا الصورة السريعة وخاصة لما البطل يجري ورا البطلة اللي خطفت منه العصير ......... أو البطل الي بيدي واحد بالشلوت ... ساعتها حنشوف الشلوت بيموه ....
حاليا : أغلب شاشات الإل سي دي سرعة الاستجابة فيها 5 ميلي في الثانية وده كويس جدا وفي شركات محترفة وصلت لسرعة 2 ميلي في الثانية مع إن الفرق مش ملحوظ أوي بس أفضل طبعا .........
وخلي بالك كلما قلت سرعة الاستجابة كان سعر الشاشة أغلى فحلو أوي عليك خمسة ملي .....

2 - دقة الشاشة .. الريزوليوشن ( كلمة صعبة أوي ) ( Resolution )
المقصود بالكلمة الصعبة دي : عدد نقاط البكسل في الشاشة كلما كان الرقم كبير ده معناه إنك حتعرض محتويات أكبر على الشاشة وده بينفع لما تكون القوايم بتاعة برنامج معين طويلة جداااااااا ....... ( مع إن ده بيأثر على الناس اللي لابسة نضارة ... أدعولي نظري يرجع تاني ) ..... وعادة ده مش حيهم المستخدم العادي وحيهم الناس بتوع البرامج الزحمة ....

وده مثال لشاشة مناسبة : شاشة 20 بوصة أو أكبر بدقة 1680 × 1050 كافية جدا لأغلب الاستخدامات, وعندما تكون الشاشة 17 بوصة فدقة 1280 × 1024 تكون مناسبة لأغلب الاستخدامات, وأما شاشة 19 بوصة فدقة 1440 × 900 تكون هايلة أوي , مع ملاحظة أن هذه أرقام تقريبية فقد تختلف من شركة لشركة ومن شاشة لشاشة حيث يعتمد الأمر على الكثير من الأشياء مثل شاشة عريضة أو مربعة وغيرها من التفاصيل .

3 – النقطة الحساسة في الإل سي دي : دعم HDCP
فرضا إنت غني وعندك بلاي استيشن 3 الغالي أوي ده ... وجيت تشغله على شاشاتك الإل سي دي الجديدة وفجأة لقيت الصورة سوداااااه ....... ما تخافش البلاي ستيشن سليم العيب في الشاشة مش بتدعم تقنية الإتش دي ( أكيد سمعت عنها ) .. وهناك تقنية في الأفلام الجديدة اسمها بلو راي وهي الأفلام العالية الجودة ( اتش دي ) لن تعمل على شاشة لا تدعم تلك التقنية حتبان سوده هي كمان ....... في الحالة دي : يا تطير الفلم يا تشتري شاشة جديدة ...... شوف أنهو أرخص ليك ..... الفلم حلو صح ...... روح اشتري شاشة .......

باختصار لازم الشاشة تدعم الـ HDCP لتشغيل محتوى HD خارجي غير الكمبيوتر مثل اكس بوكس 360 أو رسيفر HD أو غيرها من الأجهزة, مع العلم أن أغلب الشاشات الحديثة ويمكن كلها تدعم تلك التقنية ......... يارب أحوش واشتري واحدة ......

4 – شكل الشاشة : مربعة ولا عريضة (Widescreen )
حاليا معظم الشاشات عريضة ( ويد اسكرين ) ويوجد شركات قليلة تنتج الشاشات المربعة ...... عادة الشاشة العريضة أفضل في المشاهدة والجيم والصور .......... وأنا شخصيا أفضل الشاشة المربعة مش عارف ليه .... يمكن عشان بتحسسني بالعز ............

5 - زاوية المشاهدة في الشاشة ( Viewing angle )
لما تيجي تتفرج على الشاشة اللي انت لسة مشتريها الجديدة لانج حتقعد فين ...؟؟ قدامها على طول ولا حتفرج معاك أخوك الصغير ........ لو ناوي تفرج أخوك الصغير أكيد لازم تخلي بالك من موضوع الزاوية ده ........ لو مش ناوي ما تفرقش بأى ........ كله محصل بعضه ما أنت قاعد وحاطط راسك جوه الشاشة ......!!!! أوعى وريني كده بتتفرج على إيه ؟؟؟

6 – السماعات المدمجة ( Built-in Speakers )
ناس بتحب الميزة دي وناس مش بتحبها ........... اللي بيحبوها عشان توفير المساحة .... واللي مش بيحبوها عشان صوتها مش مزعج زي الصب ....... أنا من الناس اللي بتحب الإزعاج .......... بلاها سماعات بلت إن ......... وإنت حر ...

7 - تعديل و دوران شاشة الـ ال سي دي ( Adjustment )
حاول تتأكد إن الشاشة بتلف وتطلع وتنزل ........ وتروح وتيجي .... عشان لما تيجي البيت تتأكد إنك حتعرف تحطها في وضعية مريحة ......... يمكن تحب تنام تحتها ..... الله أعلم ...

8 - سطوع ( Brightness ) :
السطوع العالي مهم في حالة إذا اشتغلت على الشاشة في مكان تدخله الشمس .... اتأكد من درجة وضوح الشاشة إذا كنت ساكن في فيلا بتخشها الشمس أو ناوي تقعد على البيسين وتبلبط يا بختك .... لو مش ناوي أي سطوع يؤدي الغرض ........ ربنا يكرمنا بشاشة وعليها بيسين هدية ....
و درجة السطوع مكتوبة كده 300cd/m2 في مواصفات الشاشة ... وكلما كان الرقم أكبر كلما كانت الصورة أوضح تحت الإضاءة .... ودرجة 300cd/m2 أو 400cd/m2 تكون كافية جداً في بيوتنا اللي لا بيخشها شمس ولا هوا ......

9 - تباين ( Contrast Ratio )
المقصود به الفرق بين أعلى درجة سواد وأعلى درجة بياض وده يفضل تجربته باليد لأن أحيانا يحدث فيه تلاعب بغرض التسويق .......... ويكون مكتوب بهذا الشكل 2000:1

10 – خصائص أخرى :
يو اس بي مدمج في الشاشة ( USB )

حاجة ببلاش كده تسهل لك توصيل ملحقات اليو اس بي اللي بأت مهمة اليومين دول وخاصة إذا كنت حاطط الكيسة عند الجيران ... إنت لسة حتروح تحط الفلاشة وترجع تاني ....

منافذ الشاشة ( Connectivity )

هناك ثلاث منافذ رئيسية عادة بتكون موجودة في الشاشات الحديثة وهي :
أ - D-Sub أو VGA : وده العادي بتاع أي شاشة كمبيوتر , يوجد عادة في جميع الشاشات.
ب - DVI : وده منفذ لعرض صورة عالية الجودة من الكمبيوتر, وموجود في أغلب الشاشات الحديثة ... ويوجد غالبا في معظم كروت الفيجا الحديثة حتلاقي لونه أبيض وأطول من المخرج العادي ....... متهيألي كل الناس عارفاه ....
ج - HDMI : منفذ رائع للغاية و يوجد عادة في الشاشات الحديثة الكبيرة , ويستخدم لتوصيل أي جهاز خارجي يدعم منفذ HDMI مثل البلاي ستيشن 3 أو رسيفر HD أو كمبيوترك الشخصي في حالة توفر هذا المنفذ في كرت شاشتك الغالي , ولو مش موجود اطمن ... الصين ما خلتش حاجة فممكن استخدام وصلات تحويل إن كانت شاشتك الجديدة اللي دفعت فيها دم ألبك لا تحتوي على ذلك المنفذ الخطير ..... ربنا يخليكي لينا يا صين ....... يا ست الحبايب يا حبيبة .......

أسعار شاشة ال سي دي
رخصت شوية والحمد لله ..... أنا فاكر زمان كنت في معرض وشفت شاشة 14 بوصة بخمس تلاف جنيه ........... وكنت حشتريها .......الحمد لله الفلوس كانت ناقصة خمسة جنيه ..... ما اشترتش .. اشتريت ماوس ورجعت ........

شركات الشاشات النحيفة :
حاليا كتير أوي أويييييييييييي زي : دل واتش بي وفيو سونك وأل جي وبينك وإيسر والشهير للغاية سامسونج ........ والميزة هنا التنافس في الجودة والسعر ..... ربنا يكترهم كمان وكمان

الضمان :
كلما كان الضمان أكثر كان أفضل فضمان ثلاث سنوات خير من ضمان ثلاث سنوات إلا ربع ... وكلما كان الضمان على عدد بكسل أقل كان أفضل ... فالضمان على بكسل واحد خير من الضمان على الشاشة لما روحها تطلع .....

الموضوع متجمع من كذا اتجاه بتصرف في الأسلوب والصياغة

رجاء عند نقل الموضوع كالعادة إلى منتديات أخرى ذكر المصدر ..........

وادعولي وادعوا لأولادي يطلعوا دكاترة ... واحدة دكتورة نسا وولادة : والتانية تستلم الأطفال

واللي استفاد من الموضوع يحط رد يطمني إذا كان ده مش حيتعبه

وأسأل الله الأجر والثواب ...


لا تشغل حالك بحال الناس واشغل حالك بحال حالك وحال عيالك فمن شغل بحال الناس ضاع منه حاله واتحولت أحواله واتحول عنه الناس لسوء حاله
Back to top Go down
View user profile http://dvdallarabs.hot-me.com
 
كيف تشتري شاشة نحيفة ( lcd )
View previous topic View next topic Back to top 
Page 1 of 1

Permissions in this forum:You cannot reply to topics in this forum
DVD of all Arabs :: المنتديات العامة (Forums) :: منتدى خدمة الاعضاء Forum Member Service-
Jump to: